இந்திய பாஸ்போர்ட் (Indian Passport) வைத்திருக்கும் பலருக்கும் அது தொடர்பான விதிமுறைகள், கட்டணங்கள் மற்றும் புதுப்பித்தல் நடைமுறைகளில் பல்வேறு சந்தேகங்களும் தவறான புரிதல்களும் உள்ளன.
குறிப்பாக, சமீபத்தில் அறிமுகப்படுத்தப்பட்டுள்ள e-Passport திட்டம் மற்றும் OCI அட்டைகள் குறித்த குழப்பங்கள் பயணிகளிடையே அடிக்கடி எழுகின்றன. வெளிநாட்டுப் பயணங்களின் போது எதிர்பாராத சிரமங்கள் மற்றும் குடிவரவு (Immigration) சிக்கல்களைத் தவிர்க்க, பாஸ்போர்ட் பற்றிய சரியான தகவல்களைத் தெரிந்துகொள்வது அவசியமாகும்.
1. கடவுச்சீட்டு இருந்தால் அதுவே இந்திய குடியுரிமைக்கான முழு சான்றா?
இந்திய பாஸ்போர்ட் வைத்திருந்தாலே ஒருவர் இந்திய குடிமகன் என்பதற்கு அதுவே இறுதியான சான்று என்பது உண்மை கிடையாது. பாஸ்போர்ட் என்பது முதன்மையாக ஒரு பயண ஆவணம் (Travel Document) மட்டுமே. குடியுரிமைச் சட்டத்தின்படி, குடியுரிமை என்பதை வேறு ஆவணங்கள் மூலம் நிரூபிக்க வேண்டி வரலாம். அரிதான சில சூழ்நிலைகளில், குடிமகன் அல்லாதவருக்கும் அரசு பாஸ்போர்ட் வழங்க சட்டத்தில் இடமுண்டு.
2. e-Passport வந்தவுடன் பழைய பாஸ்போர்ட்டை உடனே மாற்ற வேண்டுமா?
சிப் பொருத்தப்பட்ட e-Passport அறிமுகமாகிவிட்டதால், பழைய பாஸ்போர்ட்டை அனைவரும் உடனடியாக மாற்ற வேண்டிய அவசியம் இல்லை. தற்போதைய பாஸ்போர்ட் காலாவதியாகும் (Expiry) வரை செல்லுபடியாகும். அது காலாவதியான பிறகு புதுப்பிக்கும் போது e-Passport வழங்கப்படும்.
3. e-Passport-ல் உள்ள சிப் மூலம் நம்மை யாராவது டிராக் (GPS) செய்ய முடியுமா?
பாஸ்போர்ட்டில் உள்ள எலக்ட்ரானிக் சிப் நாம் எங்கு செல்கிறோம் என்பதை நேரலையாகக் கண்காணிக்காது. இந்தச் சிப்பில் உங்களைப் பற்றிய தகவல்களும் பயோமெட்ரிக் விவரங்களும் பாதுகாப்பாக சேமிக்கப்பட்டிருக்கும். போலி பாஸ்போர்ட்டுகளைத் தடுக்கவும், விமான நிலையங்களில் விரைவாகச் சரிபார்க்கவுமே இது பயன்படுகிறது. இதில் GPS வசதி எதுவும் கிடையாது.
4. பாஸ்போர்ட் கட்டணங்கள் மாறவில்லையா?
பாஸ்போர்ட் விண்ணப்பக் கட்டணங்கள் ஜூலை 1 முதல் மாற்றியமைக்கப்பட்டுள்ளன. புதிய பாஸ்போர்ட் விண்ணப்பம் மற்றும் புதுப்பித்தலுக்கு புதிய கட்டண முறை பொருந்தும். எனினும், ஏற்கனவே விண்ணப்பித்து பாஸ்போர்ட் பெற்றவர்களுக்கு இதனால் எந்த பாதிப்பும் இல்லை.
5. பாஸ்போர்ட் காலாவதியாகும் கடைசி நாள் வரை பயணம் செய்யலாமா?
பாஸ்போர்ட்டில் உள்ள ‘Expiry Date’ வரை தாராளமாக வெளிநாட்டுப் பயணம் மேற்கொள்ள முடியாது. ஐக்கிய அரபு அமீரகம் உட்பட பெரும்பாலான நாடுகளுக்குச் செல்ல, உங்கள் பாஸ்போர்ட் குறைந்தபட்சம் 6 மாதங்கள் செல்லுபடியாகும் நிலையில் இருக்க வேண்டும். இல்லையெனில் விமானத்தில் ஏற அனுமதி மறுக்கப்படலாம்.
6. பாஸ்போர்ட் ‘புதுப்பித்தல்’ (Renewal) மற்றும் ‘மறுபதிப்பு’ (Reissue) இரண்டும் ஒன்றுதானா?
பாஸ்போர்ட்டில் என்ன மாற்றம் செய்தாலும் அது ‘Renewal’ கிடையாது. பெரும்பாலான சூழ்நிலைகளில் நாம் செய்வது Reissue ஆகும். பாஸ்போர்ட் தொலைந்துவிட்டால், சேதமடைந்தால், பக்கங்கள் தீர்ந்துவிட்டால் அல்லது முகவரி/பெயர் மாற்றம் செய்தால் ‘Reissue’ சேவைக்கே விண்ணப்பிக்க வேண்டும்.
7. இந்தியர்கள் இரண்டு நாடுகளின் குடியுரிமை (Dual Citizenship) வைத்துக்கொள்ளலாமா?
OCI (Overseas Citizen of India) கார்டு வைத்திருப்பவர்கள் இந்திய குடியுரிமையையும் சேர்த்து வைத்துக்கொள்ள முடியாது. ஏனெனில் இந்தியாவில் இரட்டைக் குடியுரிமைக்கு அனுமதி இல்லை. OCI என்பது வாழ்நாள் விசா போன்ற ஒரு சலுகையே தவிர, அது குடியுரிமை அல்ல. OCI கார்டு வைத்திருப்பவர்களுக்கு இந்தியாவில் வாக்களிக்கும் உரிமை கிடையாது.
8. சிறிதாக சேதமடைந்த பாஸ்போர்ட்டைப் பயன்படுத்தலாமா?
பக்கங்கள் கிழிந்திருந்தாலோ, தண்ணீரால் சேதமடைந்திருந்தாலோ அல்லது e-Passport-ல் உள்ள சிப் பழுதடைந்திருந்தாலோ அதை ‘சேதமடைந்த பாஸ்போர்ட்’ (Damaged Passport) என்றே கருதுவர். இதனால் குடிவரவுத் துறையில் (Immigration) சிக்கல் ஏற்படலாம். லேசாக கிழிந்த அல்லது நனைந்த பாஸ்போர்ட்டைப் பயன்படுத்த முடியாது. எனவே, உடனடியாக புதிய பாஸ்போர்ட்டிற்கு விண்ணப்பிப்பதே நல்லது.
