பொதுவாக, ஐக்கிய அரபு அமீரகம் என்றாலே ஆடம்பரமான ஷாப்பிங் மால்கள், வானுயர்ந்த கட்டிடங்கள் மற்றும் விலையுயர்ந்த சுற்றுலா அனுபவங்கள் மட்டுமே என்று பலரும் நினைப்பதுண்டு. ஆனால், இது முழு உண்மையல்ல!
அமீரகத்தில் வசிப்பவராக இருந்தாலும் சரி, அல்லது இங்கு வரும் சுற்றுலாப் பயணியாக இருந்தாலும் சரி… கலாச்சாரம், வரலாறு மற்றும் இயற்கை அழகை அனுபவிக்க பெரிய அளவில் செலவு செய்ய வேண்டியதில்லை. AED 50 அல்லது அதற்கும் குறைவான கட்டணத்தில், குடும்பத்துடன் மகிழ்ச்சியாக நேரத்தைச் செலவிட ஏராளமான இடங்களை துபாய், ஷார்ஜா மற்றும் அபுதாபி ஆகிய எமிரேட்கள் வழங்குகின்றன.
சிக்கனமாகச் சுற்றுலா செல்ல விரும்புபவர்களுக்காக AED 50-க்குள் அமீரகத்தில் பார்க்கக்கூடிய 20 இடங்களின் பட்டியல்:
தி துபாய் ஃபிரேம் (The Dubai Frame):
ஜபீல் பூங்காவில் அமைந்துள்ள 150 மீட்டர் உயரமான பிரம்மாண்ட சட்டகம் போன்ற துபாய் ஃபிரேம், அமீரகத்தின் நிலப்பரப்பை பறவையின் பார்வையில் இருந்து பார்க்க உதவுகிறது.
இந்த பிரம்மாண்டமான சட்டகத்தின் ஒரு பக்கத்தில் நின்று பார்த்தால், நகரத்தின் கடந்த காலத்தையும்; மறு பக்கத்தில் நின்று பார்த்தால், அதன் பிரகாசமான மற்றும் கவர்ச்சியான தற்போதைய நவீன தோற்றத்தையும் நீங்கள் கண்டு ரசிக்கலாம். இதற்கான நுழைவு கட்டணம் AED 50.
அல் ஷிந்தாகா அருங்காட்சியகம் (Al Shindagha Museum):
ஐக்கிய அரபு அமீரகத்தின் மிகப் பெரிய பாரம்பரிய அருங்காட்சியகம் என்று அழைக்கப்படும் அல் ஷிந்தாகா அருங்காட்சியகம், அதன் பார்வையாளர்களுக்கு துபாயின் கடந்த காலத்தை ஆழமாகப் புரிந்துகொள்ள ஒரு வாய்ப்பை வழங்குகிறது.
இங்கே வரலாறும் நவீன கண்டுபிடிப்புகளும் ஒன்றாகச் சங்கமிக்கும் ஓர் அனுபவத்தை நீங்கள் பெறலாம். இந்த இடம் 80 வரலாற்று வீடுகள் மற்றும் 22 அரங்குகளைக் (Pavilions) கொண்டுள்ளது. இந்த மொத்தப் பகுதியும் 310,000 சதுர மீட்டர் பரப்பளவில் ஒரு திறந்தவெளி அருங்காட்சியகமாக உள்ளது.
இங்கு 1800கள் வரையிலான காட்சிப் பொருட்களுடன், இப்பகுதியின் பாரம்பரிய எமிராட்டி வாழ்க்கை முறை மற்றும் செழுமையான கலாச்சார பாரம்பரியத்தை பற்றி பார்க்கலாம். பெரியவர்களுக்கு AED 50-ம், 5 முதல் 24 வயது வரையிலான மாணவர்களுக்கு AED 10-ம் கட்டணமாக உள்ளது.
எத்திஹாத் அருங்காட்சியகம் (Etihad Museum):
எத்திஹாத் அருங்காட்சியகம் என்பது ஐக்கிய அரபு அமீரகம் (UAE) ஒன்றிணைந்த கதையைச் சொல்லும் இடமாகும். காட்சிப் பொருள்கள், அரிய ஆவணங்கள் மற்றும் ஆழமான அனுபவங்கள் மூலம் நாட்டின் வரலாற்றைப் பற்றிப் பார்வையாளர்கள் அறிந்துகொள்ள இது ஒரு வாய்ப்பை வழங்குகிறது.
ஐக்கிய அரபு அமீரகம் நிறுவப்பட்ட வரலாற்றுச் சிறப்புமிக்க இடத்திலேயே இந்த அருங்காட்சியகம் அமைந்துள்ளது. இது நிறுவனத் தந்தையர்களின் (Founding Fathers) தொலைநோக்கு பார்வை பற்றிய தகவல்களையும், 1968 முதல் 1974 வரையிலான முக்கிய மைல்கற்களையும் காட்சிப்படுத்துகிறது. பெரியவர்களுக்கு AED 25-ம், 5 முதல் 24 வயது வரையிலான மாணவர்களுக்கு AED 10-ம் கட்டணமாக உள்ளது.
ரெயின் ரூம் (Rain Room):
ஷார்ஜாவில் உள்ள ரெயின் ரூம், வறண்ட அமீரக காலநிலைக்கு மத்தியில் மழையைப் பார்க்கும் அனுபவத்தை மட்டுமல்லாமல், நீங்கள் நனையாமல் மழைத்துளிகளைக் காணும் ஒரு ஆழமான கலை அனுபவத்தையும் வழங்குகிறது.
பார்வையாளர்கள் இருண்ட பகுதியில் நடந்து செல்லும்போது, மனித நடமாட்டம் கண்டறியப்பட்டாலும், அவர்களுக்கு நேர் மேலே மழை பெய்யாமல் தடுக்கப்படுகிறது. இந்த அமைப்பில் 2,500 லிட்டர் சுய-சுத்திகரிப்பு செய்யப்பட்ட மறுசுழற்சி நீர் பயன்படுத்தப்படுகிறது.
இது பிணையப்படுத்தப்பட்ட 3D கண்காணிப்பு கேமராக்கள் (3D tracking cameras) மூலம் கட்டுப்படுத்தப்படுகிறது. சனிக்கிழமை முதல் வியாழக்கிழமை வரை காலை 9 மணி முதல், இரவு 9 மணி வரையும், வெள்ளிக்கிழமை மாலை 4 மணி முதல் இரவு 10 மணி வரையும் திறந்திருக்கும்.
இதற்கான நுழைவு கட்டணம் பெரியவர்களுக்கு AED 25, 22 வயது குறைவான மாணவர்களுக்கு AED 15 ஆகும். 5 வயதுக்குட்ப்பட்ட குழந்தைகள் மற்றும் மாற்றுத்திறனாளிகளுக்கு அனுமதி இலவசம்.
ஷார்ஜா க்ளாசிக் கார் அருங்காட்சியகம் (Sharjah Classic Car Museum):
ஐக்கிய அரபு அமீரகம் சொகுசுக் கார்களின் அணிவகுப்பால் வாகனப் பிரியர்களுக்கு ஒரு சொர்க்கமாக விளங்குகிறது. இருப்பினும், அந்தக் கார்களின் வரலாற்றை ஆராய நீங்கள் விரும்பினால், ஷார்ஜா கிளாசிக் கார் அருங்காட்சியகம் தான் நீங்கள் பார்க்க வேண்டிய இடம்.
இந்த அருங்காட்சியகம் ஐந்து பிரிவுகளாகப் பிரிக்கப்பட்டுள்ளது. இங்குள்ள வாகனங்கள் மாடல் டி ஃபோர்டு (Model T Ford) முதல் 1974 MG மிட்ஜெட் (MG Midget) வரையிலான ரகங்களில் உள்ளன.
மேலும், ஷார்ஜாவின் ஆட்சியாளரின் விருப்பத்திற்கேற்ப தயாரிக்கப்பட்ட மற்றும் உலகில் உள்ள 2,000 கார்களில் ஒன்றான 1969 மெர்சிடிஸ் புல்மேன் லிமோசின் (Mercedes Pullman Limousine) இங்கே காட்சிப்படுத்தப்பட்டுள்ளது.
இங்குள்ள கார்கள் அனைத்தும், வாகனத் துறையின் பரிணாம வளர்ச்சியைக் காட்டும் வகையிலும், ஒவ்வொரு காலத்தின் பழங்கால விளம்பரங்களையும் காணும் வகையிலும் சீரமைக்கப்பட்டு வைக்கப்பட்டுள்ளன.
பெரியவர்களுக்கு AED 10-ம், குழந்தைகளுக்கு AED 5-ம் கட்டணமாக உள்ளது. 2 வயதுக்குட்பட்டவர்கள் மற்றும் 60 வயதுக்கு மேற்பட்டவர்களுக்கு இலவசம்.
குர்ஆனிக் பார்க் (Quranic Park):
திருக்குர்ஆனின் கதைகளை காட்சி வடிவில் அனுபவிக்க விரும்பும் இறை நம்பிக்கையாளர்களுக்கு, துபாயில் அமைந்துள்ள குர்ஆனிக் பார்க் ஒரு சிறந்த இடமாகும். பார்வையாளர்கள் இங்கே ‘Cave of Miracles’ வழியாக நடந்து செல்லலாம்.
இது திருக்குர்ஆனின் நிகழ்வுகளை தொழில்நுட்பங்கள் மூலம் விளக்குகிறது. மேலும், இங்குள்ள ‘Glass House’ ஒரு குறிப்பிட்ட சுற்றுச்சூழல் நிலைமைகளின் கீழ் வளரக்கூடிய தனித்துவமான தாவரங்களுக்கு இருப்பிடமாக உள்ளது. இந்த இடத்தில் மொத்தம் 12 பழத்தோட்டங்கள் அமைந்துள்ளன.
நடைபாதைகள், வெளிப்புற அரங்கம் மற்றும் சூரிய சக்தி மரங்கள் போன்ற பிற வசதிகளும் இங்கு உள்ளன. இங்கு பொதுமக்களுக்கு இலவசம். Cave of Miracles மற்றும் Glass House ஒவ்வொன்றிற்கும் AED 5 கட்டணமாக உள்ளது. இந்த பார்க் காலை 9 மணி முதல் இரவு 9 மணி வரை திறந்திருக்கும்.
ஷார்ஜா அக்வேரியம் (Sharjah Aquarium):
ஷார்ஜாவில், நீங்கள் குறைந்த செலவில் கடல்வாழ் உயிரினங்களை ஆராய இந்த ஷார்ஜா அக்வேரியத்திற்கு வரலாம். இங்கே பார்வையாளர்கள் வந்து காணக்கூடிய பிராந்தியத்தின் நீரில் வாழும் சுமார் 100 வகையான கடல் உயிரினங்கள் உள்ளன.
இந்த இடத்தில் 20 வெவ்வேறு தொட்டிகள் உள்ளன. இவை பல்வேறு வகையான நீர்வாழ் சூழல்களைக் காட்சிப்படுத்துகின்றன. இது உங்களுக்கும் உங்கள் குழந்தைகளுக்கும் கடல்வாழ் உயிரினங்களைப் பற்றி விரிவாகக் கற்றுக்கொள்ள ஒரு வாய்ப்பை வழங்குகிறது.
மேலும், அக்வேரியத்திற்கு அடியில் உள்ள நடைபாதை வழியாக நடந்து சென்று இந்த விலங்குகளை நீங்கள் மிக அருகில் பார்க்கலாம். இந்த அக்வேரியம் சனிக்கிழமை முதல் வியாழக்கிழமை வரை காலை 8 மணி முதல் இரவு 10 மணி வரையும், வெள்ளிக்கிழமைகளில் மாலை 4 மணி முதல் இரவு 10 மணி வரையும் திறந்திருக்கும்.
பெரியவர்களுக்கு AED 25-ம், குழந்தைகளுக்கு AED 15-ம் கட்டணமாக உள்ளது. 1 வயது குழந்தை மற்றும் 60 வயதுக்கு மேற்பட்டவர்கள், மாற்றுத் திறனாளிகள் மற்றும் அவர்களுடன் வருபவர்கள், சர்வதேச அருங்காட்சியக கவுன்சில் (ICOM) உறுப்பினர்கள் ஆகியோருக்கு அனுமதி இலவசம்.
துபாய் சஃபாரி பார்க் (Dubai Safari Park):
குளிர்காலத்தில் மட்டும் திறந்திருக்கும் துபாய் சஃபாரி பார்க், 87 வெவ்வேறு இனங்களைச் சேர்ந்த 3,000-க்கும் மேற்பட்ட விலங்குகளைக் கொண்டுள்ளது. 3 வயது மற்றும் அதற்கு மேற்பட்டவர்களுக்கு AED 50 கட்டணமாக உள்ளது.
ஊர்வனவற்றைச் சந்தித்தல் (Reptile encounter), ஆமைக்கு உணவூட்டுதல் (Tortoise feeding), பஞ்சவர்ண கிளிகளுக்கு உணவூட்டுதல் (Macaw feeding), ஒட்டகச்சிவிங்கி மற்றும் ஆடுகளுக்கு உணவூட்டுதல், குதிரைக்குட்டியை அலங்கரித்தல் ஆகிய செயல்பாடுகளுக்கு AED 20 செலுத்தி முன்பதிவு செய்ய வேண்டும். இது காலை 9 மணி முதல் மாலை 6 வரை திறந்திருக்கும்.
அல் ஐன் உயிரியல் பூங்கா (Al Ain Zoo):
அபுதாபியில் உள்ள அல் ஐன் உயிரியல் பூங்கா, பார்வையாளர்களை வனவிலங்குகளை ரசிக்க உதவுவதோடு மட்டுமல்லாமல், விலங்குகளுடன் நெருங்கிப் பழகும் அனுபவத்தையும் அளிக்கிறது.
இந்த உயிரியல் பூங்கா, அமீரக தந்தை மாண்புமிகு ஷேக் சயீத் பின் சுல்தான் அல் நஹ்யான் அவர்களால் 1968-இல், குறிப்பாக அரேபியன் ஆரிஸின் (Arabian Oryx) பாதுகாப்பிற்காக நிறுவப்பட்டது. தற்போது, இங்கு ஊர்வன, பாலூட்டிகள் மற்றும் பறவைகள் போன்ற 4,000-க்கும் மேற்பட்ட விலங்குகள் வசிக்கின்றன.
பார்வையாளர்கள் இங்கே சஃபாரி டிரக் பயணம் மேற்கொள்ளலாம், விலங்குகளுக்கு உணவளிக்கலாம் மற்றும் சிலவற்றைத் தொட்டுப் பார்க்கலாம். சமீபத்தில், இங்கு அரேபிய மணல் பூனை பாதுகாப்பு மையம் (Arabian Sand Cat Conservation Centre) திறக்கப்பட்டுள்ளது.
பாலைவனத்தின் மிகவும் அழகான மறைந்திருக்கும் உயிரினங்களில் ஒன்றான இந்த அரிய வகைப் பூனைகள் எவ்வாறு பராமரிக்கப்பட்டு பாதுகாக்கப்படுகின்றன என்பதை இங்கே பார்க்கலாம். பெரியவர்களுக்கு AED 28.35-ம், குழந்தைகளுக்கு AED 9.45 கட்டணமாக உள்ளது.
ஜுபைல் மேங்க்ரோவ் பார்க் (Jubail Mangrove Park)
மாங்குரோவ் காடுகளுக்குப் பெயர் பெற்ற அபுதாபி, தாவரங்களுக்கு இடையில் நடந்து சென்று, இங்குள்ள பல்லுயிர்த் தன்மையை அனுபவிக்க ஒரு சரணாலயத்தை உருவாக்கியுள்ளது.
ஜுபைல் தீவில் (Jubail Island) அமைந்துள்ள ஜுபைல் மேங்க்ரோவ் பூங்காவைப் பார்வையாளர்கள் சுமார் இரண்டு கிலோமீட்டர் தூரத்திற்கு நீண்டு செல்லும் மரப் பாதை வழியாகச் சுற்றிப் பார்க்கலாம்.
இந்த நடைபாதையில் ஆராய்வதற்கு மூன்று தனித்தனி தடங்கள், இயற்கை மற்றும் மாங்குரோவ் தாவரங்கள் பற்றிய கல்வி வாய்ப்புகள், மற்றும் ஓய்வு எடுக்க இடங்கள் ஆகியவை உள்ளன. இந்த இடத்தில் காலை மற்றும் இரவு நேரங்களில் கூட படகு சவாரி செய்வதற்கான வாய்ப்பும் வழங்கப்படுகிறது. பெரியவர்களுக்கு AED 15 கட்டணமாக உள்ளது.
வாசித் சதுப்பு நிலப் பாதுகாப்புப் பகுதி (Wasit Wetland Reserve)
வனவிலங்குகளில் ஆர்வம் உள்ளவர்களுக்கு, ஷார்ஜாவில் அமைந்துள்ள வாசித் சதுப்பு நிலப் பாதுகாப்புப் பகுதி ஒரு சிறந்த இடமாகும். இந்த பாதுகாக்கப்பட்ட பகுதியில், உள்ளூர் மற்றும் வலசை பறவைகள் (wild migratory birds) என 200-க்கும் மேற்பட்ட வகையான பறவைகள் வசிக்கின்றன.
ஷார்ஜா நகரின் வடகிழக்கில் உள்ள ராம்தா பகுதியில் அமைந்துள்ள இந்த சரணாலயத்தில், பல்வேறு சிறிய பாலூட்டிகள், ஊர்வன மற்றும் பூச்சிகளும் உள்ளன. இதற்கு AED 15 கட்டணமாக உள்ளது.
நூர் தீவின் பட்டாம்பூச்சி இல்லம் (Noor Island’s Butterfly House)
ஷார்ஜாவில், மஜாஸ் (Majaz) பகுதிக்கு அருகில் உள்ள ஒரு காயல் நீரின் மையத்தில் இருந்து உயர்ந்து நிற்கும் நூர் தீவு (Noor Island), ஒரு பட்டாம்பூச்சி இல்லத்திற்கும் (Butterfly House) தாயகமாக உள்ளது.
இந்த பட்டாம்பூச்சி இல்லத்தின் வடிவமைப்பு, பல சர்வதேச விருதுகளை வென்ற, கண்ணைக் கவரும் மற்றும் அழகாகச் செதுக்கப்பட்ட ஒரு கட்டமைப்பாகும்.
இதற்குள், பல்வேறு வடிவங்கள் மற்றும் அளவுகளில், நூற்றுக்கணக்கான வண்ணமயமான பட்டாம்பூச்சிகள் உள்ளன. பெரியவர்களுக்கு AED 50-ம், குழந்தைகளுக்கு AED 30-ம் கட்டணமாக உள்ளது.
ஹட்டா தேனீத் தோட்டம் (Hatta Honeybee Garden):
ஹட்டாவின் அல்-ஹஜர் மலைகளுக்கு நடுவில் அமைந்துள்ள ஹட்டா தேனீத் தோட்டம் மற்றும் கண்டுபிடிப்பு மையம் (Hatta Honeybee Garden and Discovery Centre), இப்பகுதியில் தொடங்கப்பட்ட முதலாவது மையமாகும்.
16,000 சதுர மீட்டர் பரப்பளவில் பரவியுள்ள இந்த சரணாலயத்தில், 300-க்கும் மேற்பட்ட செயலில் உள்ள தேனீ கூடுகளும் மற்றும் சமர் (Samar), காஃப் (Ghaf), சித்ர் (Sidr) போன்ற நூற்றுக்கணக்கான மரங்களும் உள்ளன.
பார்வையாளர்கள் இங்கே தேனீ வளர்ப்பு, நமது சுற்றுச்சூழலில் தேனீக்களின் முக்கியமான பங்கு பற்றி அறிந்துகொள்ள ஒரு வாய்ப்பைப் பெறுகிறார்கள். நுழைவு கட்டணம் AED 50 ஆகும்.
ராஸ் அல் கோர் வனவிலங்கு சரணாலயம் (Ras Al Khor Wildlife Sanctuary)
துபாயின் வானளாவிய கட்டிடங்களில் இருந்து சில மீட்டர்கள் தொலைவில், ஆயிரக்கணக்கான ஃபிளமிங்கோக்களை (flamingos) கொண்ட ஒரு சதுப்பு நிலம் அமைந்துள்ளது. இந்த ராஸ் அல் கோர் வனவிலங்கு சரணாலயம், ஒவ்வொரு ஆண்டும் ஓடுடைய கணுக்காலிகள் (crustaceans), பாலூட்டிகள் மற்றும் மீன்களுக்கான இனப்பெருக்க தளமாகவும் செயல்படுகிறது.
பிரமாண்டமான இளஞ்சிவப்பு நிறப் பறவைகளின் கூட்டம் தவிர, சாம்பல் ஹெரான் (grey herons), பெரிய எக்ரெட்ஸ் (great egrets), ரீஃப் ஹெரான்ஸ் (reef herons), கார்மோரன்ட்ஸ் (cormorants), கருப்பு இறக்கைகள் கொண்ட ஸ்டில்ட்ஸ் (black-winged stilts), சாண்ட்பைப்பர்ஸ் (sandpipers), ஆஸ்ப்ரே (osprey) மற்றும் பல வண்ணமயமான பறவை இனங்களும் இந்தச் சரணாலயத்தில் காணப்படுகின்றன. இதற்கான நுழைவு இலவசம்.
கல்பா ஹேங்கிங் கார்டன்ஸ் (Hanging Gardens in Kalba)
ஷார்ஜா-கல்பா சாலையில் அமைந்துள்ள கல்பா ஹேங்கிங் கார்டன்ஸ் (தொங்கும் தோட்டங்கள்), 1.6 மில்லியன் சதுர அடி பரப்பளவில் 100,000-க்கும் மேற்பட்ட மரங்களைக் கொண்டுள்ளது. இது கடல் மட்டத்திலிருந்து 281 மீட்டர் உயரத்தில் நிற்கிறது.
பசுமையான இடங்கள், படிக்கட்டுகளை அலங்கரிக்கும் வண்ணமயமான மலர்கள் மற்றும் நீர்வீழ்ச்சிகளை விரும்புவோருக்கு இது ஒரு சிறந்த இடமாகும்.
மேலும், இங்கு கடல் மட்டத்திலிருந்து 270 மீட்டர் உயரத்தில் ஒரு உணவகம் உள்ளது. இதில் 100 விருந்தினர்கள் வரை அமர்ந்து, இந்தத் தோட்டங்களின் மூன்று பக்கங்களின் பரந்த காட்சிகளை ரசிக்கலாம். நுழைவு கட்டணம் AED 10 ஆகும்.
குளோபல் வில்லேஜ் (Global Village):
துபாயின் சிறந்த ஈர்ப்புகளில் ஒன்றான பிரபலமான குளோபல் வில்லேஜ், அதிக செலவு இல்லாமல் வேடிக்கை நிறைந்த அனுபவத்தை வழங்குகிறது.
இந்த சுற்றுலாத் தலத்தில், உலகின் பல்வேறு நாடுகளைப் பிரதிநிதித்துவப்படுத்தும் அரங்குகள் (pavilions), ஒரு தீம் பார்க், பலவிதமான உணவகங்கள் மற்றும் அனைத்து வயதினருக்கான அளவிலான ஷாப்பிங் மற்றும் பொழுதுபோக்கு வசதிகள் ஆகியவை இடம்பெற்றுள்ளன.
நுழைவு கட்டணம் வார நாட்களில் AED 25, எந்த நாளிலும் (ஆன்லைன் டிக்கெட்) AED 30 ஆகும். 3 வயதுக்குட்பட்ட குழந்தைகள், மாற்றுத் திறனாளிகள் மற்றும் 65 வயதுக்கு மேற்பட்டவர்களுக்கு அனுமதி இலவசம்.
கார்டன் இன் தி ஸ்கை (Garden in the Sky)
எக்ஸ்போ சிட்டி துபாயில் (Expo City Dubai) அமைந்துள்ள கார்டன் இன் தி ஸ்கை, ஒரு சுழலும் கண்காணிப்பு கோபுரம் ஆகும். இது பார்வையாளர்களை எக்ஸ்போவிற்கு மேலே 55 மீட்டர் உயரத்திற்கு தூக்கிச் சென்று, அந்த இடத்தின் ஒரு அழகான பரந்த காட்சியை (panoramic view) வழங்குகிறது.
இந்தச் சவாரி அதன் மேல் தளத்தில் உள்ள பசுமையான மரங்கள் நிறைந்த வடிவமைப்பால், அதற்குப் பொருத்தமான பெயரைக் கொண்டுள்ளது. இதற்கான நுழைவு கட்டணம் AED 30. குழந்தைகள், மூத்த குடிமக்கள் மற்றும் மாற்றுத்திறனாளிகளுக்கு அனுமதி இலவசம்.
குழந்தைகள் நகரம் (Children’s City)
குழந்தைகள் நகரம் என்பது ஐக்கிய அரபு அமீரகத்தின் முதல் கல்வி நகரம் ஆகும். இது 2 முதல் 15 வயது வரையிலான குழந்தைகளுக்காக அர்ப்பணிக்கப்பட்டுள்ளது.
இந்த இடம், குழந்தைகள் வேடிக்கையான வடிவில் ஆராய்வதற்கும், கண்டுபிடிப்பதற்கும், விளையாடுவதற்கும், மதிப்புமிக்க தகவல்களை பெறுவதற்கும் ஒரு வாய்ப்பை வழங்குகிறது.
இங்கு பல காட்சிப் பொருட்களும், நிகழ்ச்சிகளும் உள்ளன. இதற்கான நுழைவு கட்டணம் AED 15 ஆகும். 2 முதல் 15 வயது வரையிலான குழந்தைகளுக்கு அனுமதி இலவசம்.
கலீஃபா பூங்கா (Khalifa Park)
அபுதாபியின் மையப்பகுதியில் அமைந்துள்ள கலீஃபா பூங்கா, 30 ஹெக்டேர் பரப்பளவில் விரிந்துள்ளது. அழகாக வடிவமைக்கப்பட்ட தோட்டங்கள், நீரூற்றுகளை கொண்டிருப்பதால், இது குடும்பங்களுக்கும் வெளிப்புறச் செயல்பாடுகளை விரும்புபவர்களுக்கும் ஏற்ற இடமாகும்.
பார்வையாளர்கள் இங்குள்ள மினி-மிருகக்காட்சிசாலை, அறிவியலை மையமாகக் கொண்ட குழந்தைகள் நகரம் மற்றும் எமிராட்டி பாரம்பரியத்தைக் காட்டும் காட்சிப் பொருள்கள் போன்றவற்றை பார்வையிடலாம். இதற்கான நுழைவு கட்டணம் AED 2. 3 வயது மற்றும் அதற்குக் குறைவான குழந்தைகளுக்கு இலவசம்
| படகு வகை | கட்டணம் (AED) | பயன்பாடு / நேரம் |
| சிங்கிள் கயாக்கிங் (Single Kayak) | AED 40 | ஒரு பெரியவர் (வரம்பற்ற நேரம்) |
| டபுள் கயாக்கிங் (Double Kayak) | AED 80 | 2 பெரியவர்கள் மற்றும் 1 குழந்தை( வரம்பற்ற நேரம்) |
| பெடல் படகு (Pedal Boat) | AED 100 | 2 பெரியவர்கள் மற்றும் 2 குழந்தைகள் (1 மணி நேரப் பயணம்) |
| பழுப்பு பெடல் படகு (Brown Pedal Boat) | AED 150 | 3 பெரியவர்கள் மற்றும் 2 குழந்தைகள்(1 மணி நேரப் பயணம்) |
| டோனட் படகு (Donut Boat) | AED 250 | 4 பெரியவர்கள் மற்றும் 2 குழந்தைகள்(1 மணி நேரப் பயணம்) |
