அமீரகம் ஏன் உலகிலேயே பாதுகாப்பான நாடுகளில் ஒன்றாக இருக்கிறது?

இரவு நேரத்தில் பயமின்றி நடந்து செல்வது, தவறவிட்ட பொருட்கள் மீண்டும் கிடைப்பது, குடும்பத்துடன் பாதுகாப்பாக வாழ முடிவது… இவை அனைத்தும் அமீரகத்தில் வசிக்கும் பலரின் அன்றாட அனுபவங்களாக இருக்கின்றன.

உலகின் மிகவும் பாதுகாப்பான நாடுகளில் ஒன்றாக அமீரகம் தொடர்ந்து இடம்பிடித்து வருவதற்கு பின்னால், கடுமையான சட்டங்கள் மட்டுமல்ல, நவீன தொழில்நுட்பம், விரைவான சட்ட அமலாக்கம் மற்றும் விதிமுறைகளை மதிக்கும் சமூக கலாச்சாரம் ஆகியவை முக்கிய காரணங்களாக உள்ளன.

கடுமையான சட்டங்களும் விரைவான நடவடிக்கையும்

அமீரகத்தில் விதி மீறல்களுக்கு எதிராக கடுமையான நடவடிக்கைகள் எடுக்கப்படுகின்றன. குற்றச் செயல்கள் விரைவாக விசாரிக்கப்படுவதுடன், சட்டப்படி உரிய தண்டனைகளும் வழங்கப்படுகின்றன. இதனால் குற்றங்கள் நடைபெறும் வாய்ப்பே குறைகிறது என்று பாதுகாப்பு நிபுணர்கள் கூறுகின்றனர்.

பாதுகாப்பில் தொழில்நுட்பத்தின் முக்கிய பங்கு

AI தொழில்நுட்பம், Smart Surveillance Cameras, Number Plate Recognition (ANPR), 24 மணி நேர கண்காணிப்பு உள்ளிட்ட நவீன பாதுகாப்பு அமைப்புகள் அமீரகத்தில் பெரும்பாலான இடங்களில் பயன்படுத்தப்பட்டு வருகின்றன. இதனால் அவசர நிலைகளில் சம்பவங்களுக்கு விரைவாக பதிலளிக்க அதிகாரிகளால் முடிகிறது.

உலகளவில் கிடைத்த அங்கீகாரம்

பாதுகாப்பில் அமீரகம் தொடர்ந்து உலக அளவில் அங்கீகாரம் பெற்று வருகிறது. அபுதாபி, தொடர்ந்து 10 ஆண்டுகளாக உலகின் பாதுகாப்பான நகரமாக தேர்வாகியுள்ளது. அதேபோல், துபாயும் உலகின் பாதுகாப்பான நகரங்களின் பட்டியலில் தொடர்ந்து இடம்பெற்று வருகிறது.

மேலும், Numbeo-வின் சமீபத்திய தரவுகளின்படி, துபாயின் Safety Index 83-க்கும் அதிகமாக உள்ளது. குறிப்பாக, இரவு நேரங்களிலும் தனியாக நடந்து செல்லும் பாதுகாப்பு அம்சத்தில் துபாய் உயர்ந்த மதிப்பெண்களைப் பெற்றுள்ளது.

200-க்கும் மேற்பட்ட நாடுகளைச் சேர்ந்த மக்கள் வாழும் நாடு

200-க்கும் மேற்பட்ட தேசிய இனங்களைச் சேர்ந்த மக்கள் அமீரகத்தில் வாழ்கின்றனர். பல்வேறு கலாச்சாரங்கள் மற்றும் பின்னணிகளைச் சேர்ந்த மக்கள் ஒன்றாக வாழும் இந்த நாட்டில், சட்டங்களை மதிக்கும் பழக்கம் மற்றும் பாதுகாப்பை முன்னிலைப்படுத்தும் சமூக மனப்பான்மை, அமைதியான சூழலை உருவாக்க முக்கிய பங்காற்றுகிறது.

பாதுகாப்பு என்பது ஒரு புள்ளிவிவரம் மட்டுமல்ல.. 

அமீரகத்தில் குடும்பத்துடன் நிம்மதியாக வாழ்வது, குழந்தைகளை பாதுகாப்பாக வளர்ப்பது, இரவு நேரங்களிலும் தைரியமாக பயணம் செய்வது, வெளிநாட்டிலிருந்து வரும் நண்பர்கள் மற்றும் உறவினர்கள் பாதுகாப்பாக சுற்றுலா செல்வது போன்ற அன்றாட வாழ்க்கையின் பல அம்சங்களை அது நேரடியாக பாதிக்கிறது.

அதனால்தான், அமீரகம் உலகின் பாதுகாப்பான நாடுகளில் ஒன்றாக தொடர்ந்து தனது இடத்தைத் தக்கவைத்திருப்பதோடு, இங்கு வாழும் மக்களுக்கு பாதுகாப்பான மற்றும் நம்பிக்கையான வாழ்க்கைச் சூழலையும் வழங்கி வருகிறது.