ஷார்ஜாவின் புகழ்பெற்ற மலிஹா தேசிய பூங்கா (Mleiha National Park), சர்வதேச அளவில் மிக உயரிய அங்கீகாரமாகக் கருதப்படும் உலக சுற்றுலா விருதுகள் 2026 (World Travel Awards) போட்டியில் ஒரு வரலாற்றுச் சிறப்புமிக்க மைல்கல்லை எட்டியுள்ளது.
மத்திய கிழக்கு பிராந்தியத்தின் சிறந்த தேசிய பூங்கா (Middle East’s Leading National Park 2026) என்ற மதிப்புமிக்க விருதுக்கான இறுதிப் பரிந்துரைப் பட்டியலில், ஒட்டுமொத்த ஐக்கிய அரபு அமீரகத்தின் சார்பாகத் தேர்ந்தெடுக்கப்பட்டுள்ள ஒரே ஒரு தேசிய பூங்கா என்ற தனித்துவமான பெருமையை இது பெற்றுள்ளது. இந்த அறிவிப்பு ஷார்ஜாவின் சுற்றுச்சூழல் மற்றும் பாரம்பரிய சுற்றுலாவை உலக அரங்கில் அடுத்த கட்டத்திற்கு எடுத்துச் சென்றுள்ளது.
யுனெஸ்கோவின் உலக பாரம்பரிய தளமான Faya Palaeolandscape பகுதியில் அமைந்துள்ள இந்த பூங்கா, மத்திய கிழக்கின் பிற நான்கு முன்னணி தேசிய பூங்காக்களுடன் இந்த உயரிய விருதுக்காக பரிந்துரைக்கப்பட்டுள்ளது. அமீரகத்தின் தொன்மையான தொல்பொருள் பாரம்பரியத்தையும் பல்லுயிர் பெருக்கத்தையும் பாதுகாப்பதில் மிலேஹா பூங்கா காட்டி வரும் அர்ப்பணிப்பு மிக முக்கியமானது. அதே வேளையில், இங்கு வரும் பார்வையாளர்களுக்கு உலகத்தரம் வாய்ந்த சுற்றுச்சூழல் சுற்றுலா, சாகசப் பயணங்கள் மற்றும் அறிவுப்பூர்வமான கல்வி சார்ந்த அனுபவங்களை ஒருசேர வழங்குவதிலும் இந்த பூங்கா தொடர்ந்து சிறந்து விளங்குகிறது.
உலகளாவிய சுற்றுலா, விருந்தோம்பல் மற்றும் இலக்கு மேலாண்மை துறையின் மிக உயரிய விருதாக பார்க்கப்படும் உலக சுற்றுலா விருதுகளில் மலிஹா பூங்கா பரிந்துரைக்கப்பட்டிருப்பது, அதன் சர்வதேசப் புகழை மேலும் உயர்த்தியுள்ளது. அமீரகத்தின் இந்த ஒரே பிரதிநிதியை வெற்றி பெறச் செய்வதற்கான பொதுமக்களின் வாக்குப்பதிவு தற்போது அதிகாரப்பூர்வமாக தொடங்கி, வரும் ஜூலை 31, 2026 வரை நடைபெற உள்ளது.
நம் நாட்டின் தனித்துவமான இயற்கை மற்றும் கலாச்சாரப் பாரம்பரியத்தை பிராந்திய அளவில் நிலைநிறுத்த, உலக சுற்றுலா விருதுகளின் அதிகாரப்பூர்வ இணையதளப் பக்கத்திற்குச் (https://www.worldtravelawards.com/vote-for-mleiha-national-park-middle-easts-leading-national-park-2026) சென்று அனைவரும் தங்களது வாக்குகளைப் பதிவு செய்யுமாறு கேட்டுக்கொள்ளப்படுகிறார்கள்.
