தற்கொலை இனி குற்றமல்ல; அமீரகத்தில் புதிய சட்ட திருத்தம் அமல்!

அமீரகத்தின் ‘குற்றங்கள் மற்றும் தண்டனைகள் சட்டத்தில்‘ செய்யப்பட்ட புதிய திருத்தங்களின்படி, தற்கொலை முயற்சி இனி குற்றமாகக் கருதப்படாது. தற்கொலை முயற்சியை குற்றப்பட்டியலில் இருந்து நீக்கிய அமீரக அரசு, தற்கொலைக்குத் தூண்டுபவர்களுக்குக் கடுமையான தண்டனைகள் வழங்கப்படும் என்றும் தெரிவித்துள்ளது.

தற்கொலை குற்றமல்ல 

ஐக்கிய அரபு அமீரகம் (UAE) தனது நாட்டின் குற்றவியல் மற்றும் தண்டனைச் சட்டத்தில் (Crimes and Penalties Law) வரலாற்றுச் சிறப்புமிக்க புதிய திருத்தங்களை மேற்கொண்டுள்ளது. இதன்படி, தற்கொலை முயற்சி இனி குற்றவியல் குற்றமாகக் கருதப்படாது என அறிவிக்கப்பட்டுள்ளது.

கடந்த 2020-ஆம் ஆண்டு கொண்டுவரப்பட்ட திருத்தத்தின்படி, தற்கொலைக்கு முயல்பவர்களுக்கு சிறைத்தண்டனைக்கு பதிலாக மனநல சிகிச்சை அளிக்க உத்தரவிடும் அதிகாரம் நீதிபதிகளுக்கு வழங்கப்பட்டிருந்தது. இருப்பினும், அது குற்றவியல் சட்டத்தின் வரம்பிற்குள்ளேயே இருந்து வந்தது.

ஆனால், தற்போது கொண்டுவரப்பட்டுள்ள புதிய சட்டத் திருத்தத்தின் மூலம் தற்கொலை முயற்சி மீதான குற்றவியல் பொறுப்பு முற்றிலுமாக நீக்கப்பட்டுள்ளது.

இது குறித்து சட்ட வல்லுநர்கள் தெரிவிக்கையில், “மன உளைச்சல் மற்றும் நெருக்கடியில் இருப்பவர்களுக்குத் தண்டனையை விட ஆதரவும் சிகிச்சையுமே தேவை என்பதை அரசாங்கம் உணர்ந்துள்ளது. சட்ட நடவடிக்கைக்குப் பயப்படாமல் மக்கள் உடனடியாக மனநல உதவியைப் பெறவும், குடும்பத்தினர் அச்சமின்றி அவசர உதவி கோரவும் இது பெரிதும் உதவும்” என்று குறிப்பிட்டுள்ளனர்.

தற்கொலைக்குத் தூண்டுவோருக்குச் சிறை மற்றும் நாடுகடத்தல்!

தற்கொலை முயற்சியைக் குற்றமற்றதாக்கிய அதே வேளையில், ஒருவரைத் தற்கொலைக்குத் தூண்டும் நபர்களுக்கு எதிரான தண்டனைகளை அமீரக அரசு வெகுவாகக் கடுமையாக்கியுள்ளது:

• ஒருவரின் தூண்டுதலால் ஒருவர் தற்கொலைக்கு முயன்று, அவருக்குத் தீவிர காயமோ அல்லது நிரந்தர ஊனமோ ஏற்பட்டால், தூண்டியவருக்கு 3 முதல் 5 ஆண்டுகள் வரை சிறைத்தண்டனை விதிக்கப்படும்.
• தூண்டுதலின் காரணமாக உயிரிழப்பு நேரிட்டால், குற்றவாளிக்கு 7 ஆண்டுகள் வரை சிறைத்தண்டனை வழங்கப்படும்.
• 18 வயதுக்கு உட்பட்ட சிறுவர்களைத் தற்கொலைக்குத் தூண்டினால், அது ‘திட்டமிட்ட கொலை வழக்காக’ (Premeditated Murder) கருதப்பட்டு மிகக் கடுமையான தண்டனை வழங்கப்படும்.
• இக்குற்றங்களில் தண்டனை பெறும் வெளிநாட்டினர், தண்டனைக் காலத்திற்குப் பிறகு அமீரகத்திலிருந்து கட்டாயமாக நாடுகடத்தப்படுவர்.

கொலை வழக்குகளில் குறைந்தபட்சத் தண்டனை 15 ஆண்டுகளாக உயர்வு

திட்டமிட்டுக் கொலை செய்யும் வழக்குகளுக்கான தண்டனை விதிகளிலும் முக்கிய மாற்றங்கள் செய்யப்பட்டுள்ளன.

முந்தைய சட்டத்தின்படி, பாதிக்கப்பட்டவரின் குடும்பத்தினர் குற்றவாளியை மன்னித்துத் தங்களின் ‘கிசாஸ்’ (Qisas – பழிக்குப் பழி கோரும் உரிமை) உரிமையை விட்டுக் கொடுத்தால், குற்றவாளிக்குக் குறைந்தபட்சம் 7 ஆண்டுகள் சிறைத்தண்டனை விதிக்கப்பட்டு வந்தது.

ஆனால் புதிய திருத்தத்தின்படி, குடும்பத்தினர் மன்னித்தாலும் கூட, பொதுமக்களின் பாதுகாப்பு மற்றும் சமூக நீதியைக் கருத்தில் கொண்டு, குற்றவாளி குறைந்தபட்சம் 15 முதல் 20 ஆண்டுகள் வரை கட்டாயமாகச் சிறைத்தண்டனை அனுபவிக்க வேண்டும் என்று சட்டம் திருத்தப்பட்டுள்ளது.